Toyota fékk Umhverfisverðlaun atvinnulífsins 2018 hjá Samtökum atvinnulífsins og er því Umhverfisfyrirtæki ársins. Við erum með alþjóðlega umhverfisvottun ISO 14001 og erum í fararbroddi íslenskra fyrirtækja í umhverfismálum, það er ástæðan fyrir því að okkur eru veitt þessi verðlaun.
Við erum mjög stolt af þessari viðurkenningu og hún er staðfesting á því að öll högum við vinnu okkar með ábyrgum hætti á hverjum degi, meðvitað og ómeðvitað. Þessi verðlaun eru okkur hvatning til að gera enn betur. Hér á eftir eru mælingar á umhverfisárangri okkar fyrir árið 2018.
Viðhorf starfsmanna og eigenda Toyota til umhverfismála byggir á sterkri framtíðarsýn stofnanda fyrirtækisins, Páls Samúelssonar, sem var ötull skógræktarmaður. Smátt og smátt hefur skilningur okkar, sem tókum við af Páli, aukist á vægi umhverfismála í rekstri fyrirtækisins. Skrefin voru stutt í fyrstu en stóra skrefið var tekið þegar umhverfisstjórnunarkerfið ISO 14001 var innleitt árið 2008. Umhverfisstefna fyrirtækisins er aðeins orð á blaði ef ekki fylgja athafnir. Umhverfisvottunin er ramminn um framkvæmd stefnunnar og upplýst og meðvitað starfsfólk gerir okkur kleift að ná markmiðum okkar.