Hvað er 2 ára viðbótarábyrgð Toyota?
Eins og nafnið gefur til kynna er um að ræða 2 ára viðbótarábyrgð sem tekur gildi þegar hefðbundinni 3 ára verksmiðjuábyrgð framleiðandans lýkur og gildir í 2 ár eða upp að 160 þús km akstri bifreiðarinnar. Ábyrgðin er sett fram í samstarfi við Tryggingarmiðstöðina.

Hvað er innifalið í 2 ára viðbótarábyrgð Toyota?
Ábyrgðin tekur til sömu hluta og 5 ára ábyrgðin sem fylgir með öllum nýjum Toyota og Lexus bifreiðum frá og með 1. janúar, 2010. Á heimasíðu Toyota – sjá skilmálar – er að finna ítarlista yfir þá hluti sem falla undir ofangreinda ábyrgð.

Hvaða hlutir eru undanskildir í ábyrgðinni?
Hefðbundnir slitfletir og annað sem telst til eðlilegs viðhalds bifreiðar er ekki innifalið í ábyrgðinni, s.s. bremsuklossar, olíur og síur. Þá eru demparar, soggrein og pústkerfi, lakk og innrétting og kúpling ekki innifalið í ábyrgðinni.

Hvaða bifreiðar eru gjaldgengar í 2 ára viðbótarábyrgð Toyota?
Allar Toyota og Lexus bifreiðar sem eru 48 mánaða eða yngri frá söludegi. Þá þurfa viðkomandi bifreiðar að hafa mætt reglubundið í þjónustuskoðanir og standast léttskoðun Toyota sem er eiganda bifreiðarinnar að kostnaðarlausu.

Hafi viðkomandi bifreið ekki mætt í reglubundnar þjónustuskoðanir þarf hún að gangast í gegnum og standast næstu áætluðu þjónustuskoðun út frá aldri / kílómetrastöðu bifreiðarinnar.

Hvað kostar 2 ára viðbótarábyrgð Toyota?
Iðgjald fyrir 2 ára viðbótarábyrgðina fer eftir vélarstærð viðkomandi bifreiða og eru gjaldflokkarnir fjórir. Iðgjaldið er til 24 mánaða, en hlutfallareiknast eftir því hvenær viðbótarábyrgðin er keypt. Sá sem kaupir t.d. ábyrgðina á 42. mánaða aldri bifreiðarinnar greiðir eingöngu 75% af iðgjaldinu. Ofangreind ábyrgð fylgir bifreiðinni ef hún er seld.

Verðskrá 2 ára viðbótarábyrgðar Toyota

Hvernig er greiðslufyrirkomulag 2 ára viðbótarábyrgðar Toyota

• Ef viðkomandi er núverandi viðskiptavinur Tryggingamiðstöðvarinnar (TM) fellur iðgjaldið undir sama greiðslufyrirkomulag og er þegar til staðar.
• Ef viðkomandi er ekki viðskiptavinur TM er hægt að skipta iðgjaldinu niður á 8 mánaða greiðsludreifingu á kreditkort viðkomandi
• Ef viðkomandi vill greiða iðgjaldið í einni greiðslu sendir TM viðkomandi gíróseðil fyrir allri upphæðinni.

Hvar er hægt að kaupa 2 ára viðbótarábyrgð Toyota?
Ábyrgðina er hægt að kaupa hjá öllum viðurkenndum þjónustuaðilum Toyota á Íslandi sem jafnframt geta framkvæmt nauðsynlegar þjónustu- og léttskoðanir ef þörf er á til að viðkomandi bifreið sé gjaldgeng í viðbótarábyrgðina.