Toyotaskógar

Ingunnarstaðir í Brynjudal
Skógræktarfélag Íslands hóf hér skógrækt árið 1977 og hefur einbeitt sér að því að rækta jólatré. Hér eru aðallega ræktaðar fjórar trjátegundir jólatrjáa, stafafura, rauðgreni, blágreni og sitkagreni. Brynjudalur er vel í sveit settur innst í Hvalfirði og er umlukinn háum fjöllum, með Botnssúlur trónandi yfir innst í dalnum. Hér er mikil náttúrufegurð og kjörin skilyrði til að rækta jólatré.
Umsjón hefur Skógræktarfélag Íslands

Esjuhlíðar
Fyrstu þreifingar í skógrækt hófust hér með stofnun Rannsóknarstöðvar skógræktar á Mógilsá árið 1967. Áberandi trjátegundir eru birki, sitkagreni og stafafura auk bergfuru. Skógræktarfélag Reykjavíkur tók við umsjón jarðanna Mógilsár og Kollafjarðar árið 2000 og hefur félagið haldið ræktunarstarfinu áfram. Um svæðið liggur ein vinsælasta og fjölfarnasta gönguleið landsins, upp á topp Esju. Svæðið er jafnframt hluti af Græna treflinum sem umlykur Höfuðborgarsvæðið. Mikil þörf er á frekari skógrækt í Esjuhlíðum til að veita skjól fyrir útivistina enda getur hér orðið stórviðrasamt. Árið 2006 hófst mikið ræktunarátaki í Esjuhlíðum, sem landsmenn eiga eftir að njóta ríkulega í framtíðinni.
Umsjón hefur Skógræktarfélag Reykjavíkur

Varmaland í Borgarfirði
Árið 1990 stóðu skógræktarfélögin og Toyota á Íslandi fyrir umfangsmikilli gróðursetningu í hlíðina hér að Varmalandi á fjölmennum fjölskyldudegi Toyota. Skógurinn er í samfellu við fallega skógarumgjörð staðarins, sem hefur verið ræktaður undanfarna áratugi. Skógurinn á Varmalandi er mjög fjölbreyttur og áhugaverður til útivistar. Áberandi trjátegundir eru sitkagreni, birki og stafafura, en auk þess eru hér fjölmargar aðrar trjátegundir. Skógurinn er mikið notaður af nemendum grunnskólans hér, auk þess sem Varmaland er vinsæll áningastaður ferðamanna á sumrin. Afar víðsýnt er af hamrinum ofan við skóginn.
Umsjón hefur Skógræktarfélag Borgarfjarðar

Sandar í Dýrafirði
Árið 1990 hófst ræktun hér á Söndum en svæðið er eitt af svæðum Landgræðsluskóga. Trjátegundir sem ræktaðar hafa verið á Söndum eru aðallega birki, stafafura, bergfura og sitkagreni. Svæðið er í heild um 200 hektara og er mjög ákjósanlegt útivistarsvæði enda töluvert undirlendi, en því er ekki alls staðar til að dreifa á Vestfjörðum. Svæðið snýr vel við sól og er í suðurhlíðum Sandafellsins, gegnt þéttbýlinu Þingeyri. Áberandi í landslaginu eru stórar melöldur og hólar sem skriðjökull hefur skilið eftir, en þess á milli lautir og lágar. Sandaskógur mun því í framtíðinni bjóða upp á mikla fjölbreytni í útivist.
Umsjón hefur Skógræktarfélag Dýrafjarðar

Kjarnaskógur við Akureyri
Skógræktarfélag Eyfirðinga hóf rekstur gróðrarstöðvar á 14 hektara spildu í landi Kjarna árið 1946. Árið 1971 var Kjarnaskógur gerður að útivistarsvæði og markviss uppbygging hófst á aðstöðu sem ekki á sinn líka hér á landi. Hér hefur verið ræktaður fjöldi trjátegunda sem auka enn frekar á gildi svæðisins. Kjarnaskógur er nú um 800 hektarar og er eitt allra vinsælasta og fjölsóttasta útivistarsvæði landsins, en talið að um 200.000 gestir heimsæki svæðið árlega.
Umsjón hefur Skógræktarfélag Eyfirðinga

Reyðarfjörður
Gróðursetning hófst hér í vestanverðu Kvíagili árið 1990 og var það í fyrstu aðallega stafafura, ásamt bergfuru sem hefur spjarað sig með ágætum. Með aukinni gróðursetningu og fjölbreytni trjátegunda verður til eftirsótt útivistarsvæði til gagns fyrir íbúa á Reyðarfirði, gesti og gangandi.
Umsjón hefur Skógræktarfélag Reyðarjarðar