PM (Personal Mobility) er einstaklingsfarartæki sem stígur skrefinu lengra í að persónugera bílinn. Rýmið fyrir ökumanninn minnir á belg og hefur tvo stýripinna fyrir rafstýrða hemlun, hröðun og stýrisbúnað. Burstalaus rafmótor að aftan knýr bílinn áfram. Sjónrænt samskiptakerfi heldur bílnum í sambandi við aðra PM-bíla svo þeir geti deilt upplýsingum og „spjallað saman“ um reynslu sína. PM eru félagslynd tæki sem geta ferðast í hópum þar sem eitt tekur forystuna og hin fylgja á eftir með öruggu millibili á sjálfstýringu. Aðeins fremsti bíllinn þarf að hafa ákvörðunarstaðinn forritaðan í leiðsögukerfið. PM tjáir einnig mismunandi „tilfinningar“ og notar til þess ljósdíóður á yfirbyggingunni, ljósunum og afturhjólunum sem sýna mismunandi liti. Stilling farþegarýmisins og lengd hjólhafsins laga sig að akstursskilyrðum, bíllinn stendur hátt til að auðvelda inngöngu, lækkar sig aðeins fyrir innanbæjarakstur og teygir alveg úr sér fyrir akstur á miklum hraða. Aukin lipurð fæst með afturhjólum sem hægt er að snúa í gagnstæðar áttir, þannig að hægt er að snúa bílnum á staðnum. Framhjólin hafa sjálfstæða stýringu og nýja öxulhönnun með hola miðju.