Toyota innkallar þriðju kynslóð Prius (09/02/2010)
Toyota í Evrópu hefur tilkynnt um innköllun á nýjustu útgáfu af Prius. Alls verða 52.903 bílar kallaðir inn vegna uppfærslu sem gera þarf á hugbúnaði í ABS-bremsukerfi bílsins.
Þegar hefur verið haft samband við eigendur þeirra bíla sem kalla þarf inn hér á landi og þeir boðaðir með bíla sína til uppfærslu.
Viðgerðin er framkvæmd vegna tilkynninga um óstöðuga hemlunartilfinningu við jafna en ákveðna hemlun á lausu vegyfirborði þegar ABS hemlastýrikerfið yfirtekur hemlastjórnunina. Viðgerðin felst í uppfærslu á forriti í ABS stjórntölvu. Uppfærða forritið flýtir innkomu ABS stjórnunarinnar þegar hemlað er á lausu vegyfirborði.
Engin slys hafa orðið í Evrópu vegna þessa svo vitað sé. Innköllunin á ekki við um eldri gerðir Prius, aðrar gerðir af Toyota eða Lexus.
